inShare
submit to reddit
සිම්බාබ්වේ-ශ්‍රී ලංකා එක්දින තරගාවලියේ ඉතිරි තරග 3 පැවැත්වීමට නියමිත සූරියවැව ක්‍රිකට් ක්‍රීඩාංගනය වන අලින්ගේ නවාතැනක් බවට පත්ව තිබේ. මේ වනවිට වාර්තා වන්නේ වන අලින්ගෙන් ක්‍රීඩාංගනයේ තනතීරුව ආරක්ෂා කරගැනීම සඳහා ආරක්ෂක නිළධාරීන් 10 ක් පමණ යොදවා ඇති බවයි.
පසුගිය රාජපක්ෂ පාලන සමයේ 2009 වසරේදී මෙම ක්‍රීඩාංගනය ඉදිකළ අතර මෙම ක්‍රීඩාංගනය පිහිටා ඇත්තේ තරග පැවැත්වීම සඳහා කිසිසේත් සුදුසු ප්‍රදේශයක නොවේ. හුදෙක් හිටපු ජනාධිපතිවරයා තමන්ගේ දිස්ත්‍රික්කයේ ජාත්‍යන්තර ක්‍රීඩාංගනයක් ඉදිකිරීමේ අවශ්‍යතාවය මත පමණක් පදනම්ව මෙම ක්‍රීඩාංගනය ඉදිකළ අතර පසුගියදා ක්‍රිකට් ආයතනයේ සභාපතිවරයා ප්‍රකාශ කළේ මෙය ක්‍රිකට් ආයතනයට නඩත්තු කරගත නොහැකි සුදු අලියෙකු බවට පත්ව ඇති බවයි.
සූරියවැව ප්‍රදේශය කිසිසේත් ජාත්‍යන්තර ක්‍රිකට් තරග පැවැත්වීමට අවශ්‍ය අවම පහසුකම් හෝ සහිත ප්‍රදේශයක් නොවේ. ජාත්‍යන්තර තරග පැවැත්වීමට නම් ක්‍රීඩාංගනය ආසන්නයේ තරු පංතියේ හෝටල් තිබිය යුතු වුවත් එවැනි පහසුකම් සූරියවැව ක්‍රීඩාංගනය ආසන්නයේ නොමැත. එසේම ක්‍රීඩා පිටිය නඩත්තුවට අවශ්‍ය ජලය ලබාගැනීම සඳහා ද විශාල වියදමක් දැරීමට සිදුව තිබේ.
බරපතලම ගැටලුව වන්නේ මෙම ක්‍රීඩාංගනය ඉදිකර ඇත්තේ වනඅලින්ගේ පෝෂක වනාන්තර විනාශ කරමිනි. මේ නිසා එහි සිටි වන අලින්ට යන-එන මං නොමැති වූ අතර එහි ප්‍රතිවිපාක විඳින්නට සිදුව ඇත්තේ වන අලින්ට හා අවට ප්‍රදේශයේ ජීවත් වන අහිංසක ජනතාවටයි.
ක්‍රීඩාංගනයේ සිටි මීටර් 100 ක් ඈතින් ඇත්තේ කැලෑව නිසා තමන්ගේ පෝෂණ කලාප අහිමි කර ඉදිකළ ක්‍රීඩාංංගනය බලෙන් අත්පත් කරගැනීමට මේ වනවිට වනඅලින් සමත් වී තිබේ. ඉදිරියේදී තරග පැවැත්වෙන හෙයින් වන අලින්ගෙන් ක්‍රීඩාංගනය හා තනතිල්ල ආරක්ෂා කරගැනීමට අමතර වියදමක් දැරීමට ක්‍රිකට් ආයතනයට සිදුව තිබේ.
දේශපාලනඥයන් හිතුමතේ කටයුතු කරමින් පරිසරයට සහ වන සතුන්ට හානි සිදුකරමින් ඉදිකළ මෙවැනි අසාර්ථක ව්‍යාපෘති නිසා අවසානයේ කරදර විඳින්නට සිදුව ඇත්තේ මේ කිසිවක් නොදන්නා අසරණ සතුන් හා අහිංසක ජනතාවයි.
lanka news web
