ඩුබායි දේශයට අලුතින් දූපත් ද්විත්වයක් 2020දී

වර්ග අඩි මිලියන 4ක භූමි භාගයකින් යුතු මිනිසා විසින් නර්මාණය කළ නව දූපත් දෙකක් ඉදිකිරීමට ඩුබායි රාජ්‍යය සැරසෙන බව අනාවරණය වෙයි.

මුහුද ගොඩකරමින් ඉදිකෙරෙන මෙම නව දූපත් මර්සා අල් අරාබ් ලෙස නම් කෙරෙන අතර, ඒවා බර්ජ් අල් අරාබ් ජුමෙයිරාහ් නමැති නෞකාවක හැඩය ගත් අධි සුඛෝපභෝගී හෝටලය දෙපස ඉදිවනු ඇති බවද විදෙස් වාර්තා පෙන්වා දෙයි.

මෙම යෝධ ව්‍යාපෘතිය සඳහා ඇ.ඩො.බිලියන 1.72ක මුදලක් වැය කිරීමට සැලසුම් කර ඇති අතර, මේ සමගම ඩුබායි වෙරළ තීරයට තවත් සැතපුම් 1.4ක් එකතු වන බවද පෙන්වා දෙයි.

ඩුබායි හෝල්ඩින්ග්ස් විසින් නිර්මාණය කෙරෙන මෙම දූපත්වල සමාරම්භක වැඩකටයුතු ජූනි මාසයේදී ආරම්භ කෙරෙන අතර, 2020 අවසන් වනවිට එය සම්පූර්ණයෙන් නිම කිරීම බලාපොරොත්තුව වී තිබේ.

සංචාරකයන් ඉලක්ක කරන මෙම දූපත්වලින් එක් දූපතක මුළු පවුලටම විවේකගත හැකි රිසෝට්වලින්ද, වර්ග අඩි මිලියන 2.5ක සමුද්‍රීය උද්‍යානයක් සහ ආසන 1,700කින් යුතු නෘත්‍ය ශාලාවකින්ද සමන්විත වනු ඇත. එමෙන්ම, මුහුද මායිම් වූ නිවාස ඒකක 300කින් යුතු මහල් නිවාස සංකීර්ණයක්ද මෙම දූපතට ඇතුලත් වනු ඇත.

මෙහි දෙවැනි දූපත පෞද්ගලික දූපතක් ලෙස අති සුඛෝපභෝගී විලාස් සහ නිකේතන 14කින් යුතුව ඉදිවන අතර, එහි විශේෂ තරු හෝටලයක්ද ඉදිවීමට නියමිතය.