22 July 2017

රණවිරුවෝ මිනීමරුවෝ නොවෙති – මිනීමරුවෝ රණවිරුවෝ නොවෙති

හිටපු නාවික හමුදා මාධ්‍ය ප්‍රකාශක කොමදෝරු ඩී. පී. කේ. දසනායකව අත්අඩංගුවට ගැනීමත් සමඟ අපේක්ෂා කළ යුතු ආකාරයට කිඹුල් කඳුළු හෙළමින් මාධ්‍ය සංදර්ශන ආරම්භ වී තිබේ. යහපාලන රජය රණවිරුවන්ව දඩයම් කරමින් සිටින බවට වන ප්‍රමාදය යළි කරළියට පිවිස ඇත. දසනායක නාවික හමුදාව තුළ පෑ වික්‍රමයන් ඔවුන් ඒ වෙනුවෙන් උත්කර්ෂයට නංවමින් සිටිති.

මෙය රණවිරු දඩයමක් වන්නේ කෙසේ දැයි අපට නොවැටහේ. දසනායකව අත්අඩංගුවට ගෙන ඇත්තේ ත්‍රස්තවාදයට එරෙහිව වූ යුද්ධයේදී ඔහු කළ කී දෑ දේ සම්බන්ධයෙන් නොවේ. ඔහුව අත්අඩංගුවට ගෙන ඇත්තේ කප්පම් ලබා ගැනීමේ අරමුණින් පුද්ගලයන් 11 දෙනකු පැහැරගෙන ගොස් අතුරුදහන් කිරීමේ සිද්ධියක චූදිතයකු ලෙසය. හමුදා නිල ඇඳුමක් ඇඟලා ගත් සැණින් කෙනෙකු රණවිරුවකු වන්නේ නැත. අනෙක් අතට ඕනෑම අසමජ්ජාති වැඩක් කිරීමට අධිකාරි බලයක් හෝ බලපත්‍රයක් ආරක්ෂක අංශ සාමාජිකයකු වීම තුළ හිමි වන්නේ ද නැත. තර්කය එතරම්ම සරලය. නීතියට පිටින් යමෙකු කටයුතු කර ඇත්නම් ඔහුට අනිවාර්යයෙන්ම දඬුවම් හිමි විය යුතුය. දසනායකට රණවිරු ලේබලය පින්තාරු කරමින් සිටින තක්කඩි දේශපාලනඥයන් එසේ හැසිරෙනුයේ පටු දේශපාලන වාසි ලබා ගැනීමේ අරමුණින් බව සුපැහැදිලිය. 2000 වසරේදී යුද හමුදාව සතු අලිමංකඩ ඇතුළු ප්‍රධාන හමුදා සංකීර්ණ එකින්එක ඇද වැටීමෙන් පසු යාපන කොටුවේ සිරවී සිටින හමුදා භටයන්ගේ දිවි බේරා ගැනීමට නායකත්වය දුන් මේජර් ජෙනරාල් ජානක පෙරේරා, රාජපක්ෂ සමයේදී දරුණු කායික හා මානසික පීඩාවන්ට ලක්වද්දී රණවිරුවන්ගේ අයිතිය වෙනුවෙන් අද මාධ්‍ය සංදර්ශන පවත්වන මේ මහත්වරු අවම තරමින් කටක් හෝ ඇරියේ නැත. ත්‍රස්තවාදයට එරෙහි වූ තීරණාත්මක අවසන් සටන සඳහා හමුදාවට නායකත්වය සැපයූ සරත් ෆොන්සේකා හමුදාපතිවරයාට පසු කාලයකදී එළවා එළවා පහර දෙද්දීත් මේ ඊනියා දේශප්‍රේමීන් දැක්වූයේ එවැනිම වූ නිශ්ශබ්දතාවකි. රාජපක්ෂ සමයේ ඒ තරමටම සමාජය නිර්වින්ධනය කර පැවැතිණි.

හමුදා හෝ පොලිස් සාමාජිකයන් මිනීමැරුම් පැහැර ගැනීම් ඇතුළු අපරාධයන් සම්බන්ධව අත්අඩංගුවට ගැනීම් මීට පෙර සිදුව ඇත්තේ වරකදී දෙකකදී නොවේ. ඕනෑ තරම් එබඳු සිදුවීම් හමුවේ 1996 අගෝස්තු 6 වැනි දින ක්‍රිෂාන්ති කුමාරස්වාමි දැරියව දූෂණය කර මරා දැමීම හා ඇගේ මව වූ රාසම්මාගේ දහසය හැවිරිදි සහෝදරයා වූ ප්‍රාණවන්ගේ හා පවුලේ හිතවතකු වූ කිරුබාකරන්ගේ ගෙළ සිර කර සිරුර කොටස්වලට කපා හමුදා කඳවුරක වළලා තිබියදී පසුව සොයා ගන්නා ලදී. එම ම්ලේච්ඡ ඝාතන සම්බන්ධයෙන් යුද හමුදාවට හා පොලීසියට සම්බන්ධ පස්දෙනෙකු වරදකරුවන් වන ලදී. 1989 අගෝස්තු මාසයේ සිට නොවැම්බර් දක්වා කාල පරාසය තුළ ඇඹිලිපිටියේ පාසල් සිසුන් තිස්දෙනෙකු අතුරුදන් කිරීම සම්බන්ධයෙන් ඉහළ හමුදා නිලධාරියෙකු ඇතුළු හමුදා සාමාජිකයන් කිහිප දෙනෙකු වරදකරුවන් විය. 2000 ඔක්තෝම්බරයේදී බිඳුණුවැව දී මෙන්ම 71 අප්‍රියෙල් 16 වැනි දින සිදුවූ සුප්‍රකට ප්‍රේමවතී මනම්පේරි ඝාතන සිදුවීමේදී ආ ආරක්ෂක අංශ සාමාජිකයන්ට එරෙහිව විශේෂ සැලකීමකින් තොරව නීතිය ක්‍රියාත්මක වී තිබේ. එම ඉතිහාසය සමඟ බලන විට මේ සිදු වීම මහා අමුතු දෙයක් නොවේ.

කොමදෝරු දසනායකව අත්අඩංගුවට ගැනුණු මේ සිදුවීම කරළියට පැමිණියේ හිටපු නාවික හමුදාපති අද්මිරාල් වසන්ත කරන්නාගොඩ 2009 මැයි 28 වැනි දින කොළඹ අපරාධ කොට්ඨාසය වෙත ඉදිරිපත් කරන ලද පැමිණිල්ලක් සමඟය. සක්‍රීය නාවික හමුදා සේවාවේ නිරතව සිටිමින් එල්. ටී. ටී. ඊ. ය සමඟ ඍජුව හෝ වක්‍රව සම්බන්ධතා පැවැත්වීම පිළිබඳව හොයා බලන ලෙස ඉල්ලමින් කරන්නාගොඩ මහතා එම පැමිණිල්ල ඉදිරිපත් කර තිබුණේ තම පෞද්ගලික ආරක්ෂක නිලධාරියා ලෙස කටයුතු කළ ලුතිනන් කමාන්ඩර් සම්පත් මුණසිංහට එරෙහිවය. එම පැමිණිල්ල සම්බන්ධයෙන් නාවික හමුදාවේ එවකට සිටි විනයාරක්ෂකාධිපති කපිතන් සේනක හංවැල්ල මහතා විසින් කරන ලද ස්ථානීය පරීක්ෂාවකදී සම්පත් මුණසිංහ පරිහරණය කළ නිලධාරී නිවස්නෙහි අංක 8 දරන කාමරය තුළ තදාසන්න කාලයේ පැහැර ගැනීම්වලට ලක්වූ පුද්ගලයන් කිහිප දෙනෙකුගේ ජාතික හැඳුනුම්පත් විදේශ ගමන් බලපත්‍ර ණය කාඩ්පත් සහ ජංගම දුරකථන රැසක් හමුවන ලදී. ඒවා අතර ගල්කිස්ස ලංකා බැංකුවේ අංක 049568 දරන රුපියල් 760,000 ක චෙක්පත, ඒ 3323 දරන රුපියල් 500,000 ක් සඳහන් කොළ පැහැති පොරොන්දු පත්‍රය, අංක 5656 දරන රුපියල් 400,000ක් සඳහන් රෝස පැහැති පොරොන්දු පත්‍රය, අංක 8020019831 දරන සම්පත් යන අයගේ කොමර්ෂල් බැංකු ගිණුම් පොත, අංක 7960595 දරන සම්පත් යන අයගේ ලංකා බැංකු ගිණුම් පොත, අංක 002020330398 දරන සම්පත් අය අයගේ එච්. එන්. බී. ගිණුම් පොත. 002093553 දරන සම්පත්ගේ හැටන් නැෂනල් බැංකු ගිණුම් පොත, N 1431844 දරන ස්ටැන්ලි ලියෝන් නමැත්තාගේ විදේශ ගුවන් ගමන් බලපත්‍රය, අංක 601772809V දරන කේ. ඒ. ඇන්ටන් යන අයගේ ජාතික හැඳුනුම්පත, අංක 790683021V දරන ත්‍යාගරාජා ජෙගන් යන අයගේ ජාතික හැඳුනුම්පත 584201179V දරන එන්. එස්. ලියෝන් යන අයගේ ජාතික හැඳුනුම්පත අමලන් ලියෝන් හා රොෂාන් ලියෝන් යන අයගේ ජාතික හැඳුනුම්පත්, විදේශ ගමන් බලපත්‍ර ඔවුන් සමඟ රාමනාදන් මහල් නිවසේ පදිංචිව සිටි ඉංග්‍රීසි ජාතික මයික් ඕගන්ගේ ජංගම දුරකථනය ද එහි තිබී හමු වන ලදී. එම බඩු භාණ්ඩ තමන් සන්තකයට ගත් කපිතන් සේනක හංවැල්ල වැඩිදුර පරීක්ෂණ සඳහා ඒවා අපරාධ පරීක්ෂණ දෙපාර්තමේන්තුව වෙත මැයි 30 වැනි දින බාර දෙන ලදී. අමතක නොකළ යුතු කරුණ වන්නේ මේ කාලය වන විට සම්පත් මුණසිංහ නාවික හමුදා රාජකාරිවලින් ඉවත්ව යටිබිම්ගත ජීවිතයකට හුරුව තිබිණි.

“නේවි සම්පත්” යනුවෙන් ප්‍රචලිත සම්පත් මුණසිංහ, වසන්ත කරන්නාගොඩ නැ‍ඟෙනහිර නාවික ප්‍රදේශය භාර අඥාපතිව සිටි සමයේ ත්‍රිකුණාමලයේ නාවික බුද්ධි අංශ නිලධාරියකු ලෙස කටයුතු කළේය. ඔහු එල්. ටී. ටී. ඊ යේ ක්‍රියාකාරකම් පිළිබඳව නිරන්තර සෝදිසියෙන් සිටිමින් වැදගත් තොරතුරු රැසක් කල් තියා හෙළි කර ගත් දක්ෂ නිලධාරියෙකු විය. අද්මිරාල් වසන්ත කරන්නාගොඩ නාවික හමුදාපතිවරයා වූ පසු ඔහුගේ පෞද්ගලික ආරක්ෂක නිලධාරීයා වූයේ සම්පත්ය. සම්පත් හා කරන්නාගොඩ මහතා අතර පැවැති සම්බන්ධය කෙතරම් එකක් ද කිවහොත් එය පියෙකු හා දරුවෙකු අතර මට්ටමේ සමීප සම්බන්ධතාවයක් විය. එසමයෙහි බොහෝ ඉහළ නිලධාරීන් තම මාරුවීම් සිදු කර ගැනීමට සම්පත් වෙත පැමිණීමෙන් ඔහු වටා තිබු රැස් වළල්ලේ තරම පෙනී යයි. හිටි හැටියේ සම්පත් හා කරන්නාගොඩ මහතා අතර පැවැති ඒ සමීප සම්බන්ධය නොඑසේනම් එම විශ්වාසය පළුදු වූයේ කෙසේ ද යන්න තවමත් හරිහැටි පැහැදිලි නොමැත. ඒ ගැන ඇති කථා බොහෝය.

මේ අතර සම්පත් මුණසිංහගේ සැක කටයුතු ගනුදෙනු රැසක් පිළිබඳව තොරතුරු රැසක් කරන්නාගොඩ මහතාට දැනගැනීමට ලැබී තිබිණි. ඒ අතර මිලියන ගණනක මුදල් ඉල්ලමින් සිසුන් පස්දෙනකු පැහැරගෙන යෑම පිළිබඳ සිදුවීමක් ද විය. ඒ පිළිබඳ කන වැකුණු වහාම ඒ ගැන අභ්‍යන්තර පරීක්ෂණයක් පවත්වන ලෙස එවකට නාවික හමුදාවේ බුද්ධි අංශ පරීක්ෂකවරයා ලෙස කටයුතු කළ ආනන්ද ගුරුගේ මහතාට දැනුම් දෙන ලදී. එම අතුරුදහන් කිරීම පිළිබඳ විස්තර කපිතන් ජගත් ජයන්ත රණසිංහ විසින් හෙළිකර තිබූ අතර එම තරුණයන් පස්දෙනා වූයේ ප්‍රදීප් විශ්වනාදන්, තිලකේශ්වරන් රාමලිංගම්, රජිව් නාගනාදන්, මොහොමඩ් ජිලාල් ජමාල්ඩීන් හා මොහොඩ් සාජීත්ය. කොමදෝරු උදයකීර්ති විජය බණ්ඩාර වෙත එවන ලද කෙටි පණිවිඩයක් මඟින් එය ජගත් රණසිංහ දැනුම් දී තිබිණි.
එම තරුණයන් පැහැර ගැනීමෙන් පසු රජිව් නාගනාදන්ගේ දෙමවුපියන්ට කථා කරමින් දරුවන්ව නිදහස් කිරීමට රුපියල් මිලියන 10 ක කප්පමක් ඉල්ලා තිබූ අතර පසුව එය මිලියනය දක්වා අඩු කර නාවික හමුදාපතිවරයා සමීපයෙහි වැඩ කරන සම්පත් නැමැති නිලධාරියෙකුට ලබාදීය යුතු බව පැහැර ගන්නා ලද පුද්ගලයෙක් රාමනාදන් පවුල වෙත දැනුම් දී තිබිණි.

තමන් වෙත ලැබුණු එම බඩු භාණ්ඩ සම්බන්ධයෙන් අපරාධ පරීක්ෂණ දෙපාර්තමේන්තුව පරීක්ෂණ පවත්වද්දී හෙළි වූ වැදගත් කරුණක් වූයේ තමනට හමු වූ ජාතික හැඳුනුම්පත් හා ගුවන් ගමන් බලපත්‍ර හිමි සිවු දෙනකු 2008 වසරේ සිට අතුරුදහන් වී ඇති බවය.

ඒ අතරින් කෙනෙකු වූ ස්ටැන්ලි ලියෝන් ආරිප්පුහි නැ‍ඟෙනහිර ආරිප්පුවල අංක 47/1 දරන ස්ථානයේ පදිංචිකරුවකු විය. ඔහු කොළඹට පැමිණ තිබුණේ සිය පුත්‍රයා වූ අමලන් ලියෝන් හා මයික් ඕගන් නමැති විදේශිකයකු සමඟය. කොළඹ ගමනේ අරමුණ වූයේ එක්සත් රාජධානිය බලා යෑමට වීසා බලපත්‍ර ලබා ගැනීමටය. කොළඹට පැමිණි ඔවුන් නතර වූයේ කොටහේන රාමනාදන් මහල් නිවාස සංකීර්ණයේය. 82/73සී හී ය. ආයුධ සන්නද්ධ නාඳුනන කල්ලියක් විසින් ස්ටැන්ලි හා අමලන්ව පැහැරගෙන තිබුණේ 2008 අගෝස්තු 25 වැනි දිනදීය. සම්පත්ගේ නිලධාරී නිවස්නයෙහි තිබී හමු වූ ජාතික හැඳුනුම්පතක නම සඳහන්ව තිබූ ත්‍යාගරාජා ජෙගන් ත්‍රිකුණාමලයේ පදිංචිකරුවකු විය. කොළඹ 13 ජිංතුපිටියේ ස්වර්ණාභරණ අලෙවිසලක සේවය කළ ජෙගන් ද අතුරුදන්ව තිබුණේද 2008 වසරේදීය.

සම්පත් මුණසිංහ යටතේ රාජකාරි කළ නාවික සංඥා සෙබළ අලුත්ගෙදර උපුල් බණ්ඩාර හා ලක්ෂ්මන් උදය කුමාරගෙන් කරන ලද ප්‍රශ්න කිරීම්වලදී මෙම පැහැර ගැනීම් පිළිබඳව තවත් වැදගත් තොරතුරු රැසක් අනාවරණය කරගැනුමට අපරාධ පරීක්ෂකයන් සමත් විය. මාතලේ රත්තොට පාර කළුදාවල පදිංචිකරුවකු වන උපුල් බණ්ඩාර සදහන් කර තිබුණේ 2008 වසරේ දිනක සම්පත් මුණසිංහ විසින් තමා අමතා සැක කටයුතු පුද්ගලයන් පස්දෙනෙකු ටාටා ඉන්ඩිගෝ වර්ගයේ කළු පැහැති මෝටර් රථයකින් දෙහිවල බඩෝවිට මාර්ගයට හැරෙන ස්ථානයට රාත්‍රී 10.00 ට පැමිණෙන බවත් ඔවුන් අත්අඩංගුවට ගෙන දැනුවත් කරන ලෙස පැවසු බවත්ය. ලුතිනන් කමාන්ඩර් හෙට්ටිආරච්චි ඇතුළු කණ්ඩායමත් සමඟ වෑන් රථයකින් ගොස් ඉහත නියෝගය ක්‍රියාත්මක කළ බව උපුල් බණ්ඩාර පවසා තිබිණි. ඒ සමඟම ඔවුන් ගමන් කළ කළු පැහැති KC 5559 දරණ මෝටර් රිය ද රැගෙනවිත් තිබිණි. නාගනාදන් පවුලේ ආර්ථිකමය හැකියාව පිළිබඳව සම්පත් මුණසිංහට විස්තර ලබා දී තිබුණේ, ආරක්ෂක අංශවලට ඔත්තු සැපයූ අන්වර් අලී නොහොත් හාජ්ජියාර් නමැත්තෙකි. අන්වර් අලී දෙහිවල පොලිස් ස්ථානය අසල ප්‍රනාන්දු පටුමගේ පදිංචිකරුවකු විය.

රජිව් නාගනාදන් කොළඹ ජාත්‍යන්තර පාසලේ සිසුවකු වූ අතර ඔහු අධ්‍යාපනය සම්බන්ධයෙන් විශිෂ්ට දක්ෂතා පෙන්වූවකු විය. ඔහු පැහැර ගැනීමට ලක් වූයේ වැඩිදුර අධ්‍යාපන කටයුතු සඳහා එක්සත් රාජධානිය බලා යෑමට පෙර දිනයේදීය. ක්‍රිකට් ක්‍රීඩාව සඳහා ද විශේෂ දක්ෂතා දැක්වූ රජිව්ගේ උසස් පෙළ ප්‍රතිඵල සටහන් වූයේ ‘ඒ’ සාමාර්ථ දෙකක් සහ ‘බී’ සාමාර්ථයක් ලෙසිනි. වෛද්‍යවරයකු වී තම මවුබිමට සේවය කිරීම ඔහුට අවශ්‍යව තිබිණි. රජිව්ගේ දෙමවුපියන් ඔහුට කෙතරම් සෙනෙහසක් දැක්වූවා ද කිවහොත් උසස් පෙළ සාර්ථකව සමත් වීමෙන් අනතුරුව බීඑම්ඩබ්ලිව් රථයක් ඔහුට තිළිණ කිරීමට ඔවුන් කටයුතු කළේය. ඔහුගේ උපන් දින සාද පැවැත්වූයේ අගනගරයේ ඇති ඉහළම හෝටල්වලය. කප්පම් මුදල් ගැනීම සඳහා ඔහුව පැහැර ගන්නේ ඒ සියල්ල හොඳහැටි අධ්‍යයනය කිරීමෙන් අනතුරුවය.

රජිව් පිළිබඳව එම ඔත්තු‍ සපයා තිබුණේ අන්වර් අලීය. විදෙස්ගත වීමට පෙර දින රාත්‍රියේ රජිව් තම මිතුරන් ද සමඟ රෑ කෑමට පිටතට පැමිණියේ ගල්කිස්ස ශාන්ත තෝමස් විදුහල අසල ඇති සුප්‍රසිද්ධ සැලුනයකින් කොණ්ඩයද කපා ගැනීමේ හා අන්වර් අලීව ද හමුවීමේ අරමුණු ද සහිතවය.

මේ වන විට හෙළි වී ඇති තොරතුරුවලට අනුව පැහැර ගැනීමෙන් අනතුරුව රජිව් ඇතුළු කණ්ඩායම ගෙනවිත් ඇත්තේ කොළඹ චෛත්‍ය පාරේ පිහිටි නාවික හමුදා කඳවුරේ පිට්ටු බම්බුව නම් ස්ථානය වෙතටය. එතැනින් ඔහුව ත්‍රිකුණාමලය නාවික තටාකාංගණයේ පිහිටි නාවික කඳවුරට රැගෙන ගොස් ඇත. ශ්‍රී ලංකා නාවික හමුදාවට අයත් විශාලම නාවික කඳවුර වන එය නාවික හමුදාවේ හදවත ලෙස සැලැකෙයි.

ඉන්දියන් සාගරය තුළ බ්‍රිතාන්‍ය නාවික හමුදාවට අයත්ව තිබූ විශාලම කඳවුර වූ එය 1957 වසරේ ඔක්තෝම්බර් 15 වන දින රාජකීය ලංකා හමුදාවේ භාරයට පත්වන ලදී. ඓතිහාසික වටිනාකමක් සහිත එහි දෙවන මහා ලෝක යුද්ධයට පෙර සිට සවිකරන ලද විශාල නාවික කාලතුවක්කු තවමත් දැකගත හැකිය. එම කාලතුවක්කුවලට අවශ්‍ය උණ්ඩ සහ නෞකාවලට අවශ්‍ය වෙඩි බෙහෙත් ගබඩා කර තැබීමට සකස් කරන ලද විශාල උමං මාර්ග හා භූගත ගබඩා තවමත් එහි පවතී. ත්‍රිකුණාමලයට රැගෙන ආ රජිව් නාගනාදන් ඇතුළු පිරිසව රඳවා තබන ලද්දේ ගන් සයිඩ් නමින් හඳුන්වනු ලබන එවැනි එක් භූගත සිර මැදිරියකය. රජිව් නාගනාදන් ඇතුළු තරුණයන් පිරිස පැහැරගත් කණ්ඩායම අවසානයේ කප්පම් මුදල් පිළිබඳ ඇතිවූ ප්‍රශ්නයක් මත අන්වර් අලීව ද පැහැර ගැනීමට කටයුතු කළේය. ඒ තරුණයන් පස්දෙනාගේ පැහැර ගැනීම පිළිබඳ කිසිදු සාක්ෂියක් ඉතිරි නොකිරීමේ අරමුණිනි.

එම පැහැර ගැනීම සිදු වූයේ කටුනායක ගුවන් තොටුපළේ සිට කොළඹ දෙසට පැමිණෙමින් සිටියදීය. පැහැර ගැනීමට ලක්වූ සියලු දෙනාම එකවර ත්‍රිකුණාමලය නාවික හමුදා කඳවුරේ රඳවා සිටි බවට ප්‍රමාණවත් සාක්ෂි අපරාධ පරීක්ෂකයන් මේ වන විට සොයාගෙන ඇත. ත්‍රිකුණාමලයේ නාවික හමුදා කඳවුරේ සිටියදී රජිව් නාගනාදන් තම නිවෙසට ද කතා කර ඇත.

වරක් අන්නච්චි නම් පුද්ගලයකු දුරකථනයෙන් රජීව්ගේ පියා වන ගෝවින්ද්‍ර ස්වාමිගෙන් ඉල්ලා ඇත්තේ දරුවන් මුදා හැරීමට නම් රුපියල් මිලියන 10ක කප්පමක් තමන්ට අවශ්‍ය බවය. හෙට්ටු කිරීමකින් අනතුරුව අවසානයේදී ගනුදෙනුව ලක්ෂ 50 තෙක් අඩු විය. මුදල් ද රැගෙන නාරම්මලට පැමිණෙන ලෙස කප්පම්කරුවන් රජිව්ගේ පියාට දැනුම් දුන්මුත් ඔහු පවසා ඇත්තේ නාරම්මල වෙනුවට වැලිසරට පැමිණෙන ලෙසය. එවිට “ලොකු අන්නච්චිගෙන්” විමසා පිළිතුරක් දෙන බව කියමින් දුරකථනය විසන්ධි කර ඇත. මේ අතර 2009 ජනවාරි 15 දින රජිව් තම පියාට දුරකථන ඇමතුමක් ලබා දී ඇත.

මාස ගණනකට පසු තම පුත්‍රයාගේ කටහඬ ඇසුණුමුත් කතා කරන්නේ පුත්‍රයාම ද යන්න දැනගැනීමට ගෝවින්ද ස්වාමිට අවශ්‍ය විය. ඒ නිසාම ඔහු පෞද්ගලික ප්‍රශ්න කිහිපයක් සිය පුත්‍රයාගෙන් විමසුවේය.

නිවසේ මාළු ටැංකියේ සිටින මාළුන් පිළිබඳව ද පියා පුතාගෙන් විමසුවේය. කතා කරන්නේ රජිව් බව සැක හැර දැනගත්තේ එම පරීක්ෂාවෙන් අනතුරුවය. තමන්ට මුහුණ දීමට සිදුවූ දෑ ඇතුළු බොහෝ විස්තර රජිව් සිය පියාට පවසන ලදී. මේ ආකාරයට 2009 අප්‍රියෙල් මාසයේදී ද හේෂාන් නමැත්තෙකුගෙන් රජිව්ගේ දෙමවුපියන්ට දුරකථන ඇමතුමක් ලැබිණි. ඔහු ද ඉල්ලා කියා සිටියේ කප්පම් ගෙවූහොත් දරුවන් නිදහස් කරන බවය. පසුව එම පුද්ගලයා අවස්ථා කිහිපයකදීම තම දුරකථනය ඔස්සේ දෙමවුපියන් හා කතා කිරීමේ ඉඩ රජිව්ට ලබා දුන්නේය.

කොළඹ සිට තමන්ව ත්‍රිකුණාමලයට රැගෙන විත් ඇති බව රජිව් ඒ අවස්ථාවේදී දැනුම් දුන්නේය. තම පුත්‍රයා ඇතුළු පිරිස නාවුක හමුදා භාරයේ සිටින බව සැක හැර තහවුරු කරගැන්මෙන් අනතුරුව ඔවුන් නිදහස් කර ගැනීම වෙනුවෙන් ගෝවින්ද ස්වාමි තම මිතුරෙකු වන අමාත්‍ය ෆිලික්ස් පෙරේරාගේ සහාය පැතීය. ෆිලික්ස්, වාචිකව මෙන්ම ලිඛිතවත් ඒ පිළිබඳව නාවික හමුදාපතිවරයාව දැනුවත් කළ මුත් කිසිවක් සිදු වූයේ නැත. අත්අඩංගුවට ගත් පිරිස ත්‍රිකුණාමලයේ සිටින බවට තවත් සාක්ෂියක් 2009 මාර්තු 23 වැනිදා අන්වර් අලීගේ ඥාති සහෝදරයකු වන සිරාජ්ගේ ජංගම දුරකථනයට ලැබිණි.

“සම්පත් මාව අල්ලාගත්තා. ඩී.අයි.ජී. කමල්ඩීන්ට කියලා මාව බේරගන්න.” ඔහු පැවසුවේය. 2009 ජුලි 26 වැනිදා නැවත දුරකථන ඇමතුමක් අන්වර්ගෙන් සිරාජ්ට ලැබිණි.

“මාව තියාගෙන ඉන්න අන්තිම දවස අද. කොහොමහරි මාව බේරගන්න.” ඔහු පැවසුවේය. ඉන්පසු කිසි දිනෙක ඔහු කථා කළේ නැත.

කප්පම් ගැනීමේ අරමුණින් මේ සියලු දෙනා පැහැරගත් බව සුපැහැදිලි වන අතර වරක් අන්නච්චි නමින් කථා කළ පුද්ගලයා ත්‍යාගරාජා ජෙගන්ගේ මවට කථා කර රුපියල් මිලියනයක කප්පම් මුදලක් ඇයගෙන් ද ඉල්ලා සිටියේය. අනතුරුව ගනුදෙනුව ලක්ෂ 5ක මුදලක් දක්වා අඩු වූ අතර තඹලගමුව ප්‍රදේශයට කප්පම් මුදල් ද රැගෙන යෑමෙන් පසු එය රැගෙන පළා යෑමට කටයුතු කරන ලදී.

මේ සමස්ත සිදුවීම් ජාලය දෙස බලන විට නාවික හමුදාවට සම්බන්ධ කණ්ඩායමක් මේ පිටුපස සිටින බව පැහැදිලිය. ශ්‍රී ලංකා නාවික නෞකා පරාක්‍රම ආයතනයේ විශේෂ රාජකාරිවලට අනුයුක්තව සිටි නාවික හමුදාවේ හිටපු ලුතිනන් කමාන්ඩර් සම්පත් හෙට්ටිආරච්චි හා වසන්ත කරන්නාගොඩ නාවික හමුදාපතිවරයාගේ පුද්ගලික ආරක්ෂක නිලධාරියාව සිටි සම්පත් මුණසිංහ යටතේ පැවැති ආවේක්ෂණ කණ්ඩායමේ නිලධාරීන් විසින් විවිවිධ ක්‍රම උපායන් භාවිත කරමින් මෙම පැහැර ගැනීම් සිදුකර ඇති බව මේ වන විට තොරතුරු අනාවරණය කරගෙන ඇත. කොළඹ, වත්තල, කොටහේන, දෙහිවල හා කටුනායක යන ප්‍රදේශවලදී පුද්ගලයන් 11 දෙනෙකු මේ ආකාරයට පැහැරගෙන ගොස් ඇත. පසුව එම පුද්ගලයන් ත්‍රිකුණාමලය ‘ගන් සයිඩ්’ නම් සිර මැදිරිවල නීති විරෝධීව රහසිගතව රඳවා ගනිමින් අතුරුදහන් කර තිබේ. ඔවුන් එහි රඳවා තබාගෙන සිටි සමයේ ශ්‍රී ලංකා නාවික නෞකා තටාකාංගණ ආයතනයේ බුද්ධි නිලධාරියා වශයෙන් කටයුතු කර ඇත්තේ මේ වන විට කොමදෝරු ධූරයේ කටයුතු කරන සුමිත් රණසිංහය.

ඩී. කේ. පී. දසනායක මේ අහස පොළොව නුහුළන අපරාධයට සම්බන්ධ වී ඇති ආකාරය පිළිබඳවද විස්තර රැසක් හෙළි වී ඇත. කොළඹ චෛත්‍ය පාරේ නාවික හමුදා කඳවුරේ සිටියදී රජිව් නාගනාදන් තමන් රඳවා සිටින ස්ථානය හා ඒ අසල නවතා ඇති වාහන පිළිබඳ විස්තරයක් සිය මවට පවසා ඇති අතර කපිතන් දසනායකගේ H.P. 8987 දරන මෝටර් රථයේ විස්තර ද ඔහු එසේ හෙළි කර ඇත. රජිව්ට එසේ කළ හැක්කේ ඩී. කේ. පී. දසනායක ඔහු රඳවා සිටි ස්ථානයට පැමිණි නිසා හෝ අවට සිටි පුද්ගලයන්ගෙන් ලබාගත් තොරතුරු අනුව විය යුතුය. මේ අතර සම්පත් මුණසිංහ ද අපරාධ පරීක්ෂකයන් වෙත ලබාදුන් තම ප්‍රකාශයේදී සඳහන් කර තිබුණේ වසන්ත කරන්නාගොඩ, හිටපු නාවික හමුදාපතිවරයා දෛනිකව පවත්වන ලද පැය 24 හි ප්‍රගති සමාලෝචන රැස්වීමකදී දෙහිවලදී පැහැර ගැනීමකට ලක්වූ තරුණයන් ‍පස්දෙනා පිළිබඳව එවකට සිටි නාවික හමුදාපතිවරයාව, දසනායක විසින් දැනුවත් කළ බවය. මේ අතර අරිප්පු ප්‍රදේශයේ සිට අමලන් ලියෝන් පිළිබඳ ඒ. එම්. අශෝක මහේෂ් කුමාර නම් නාවික හමුදා නිලධාරියා සම්බන්ධතා පවත්වා ඇත්තේ ඩී. කේ. පී. දසනායකගේ අධීක්ෂණය යටතේය. අශෝක් මහේෂ් කුමාර, සම්පත් මුණසිංහ යටතේ සිටි නිලධාරියකු වුවද තම මෙහෙයුම් කටයුතු සඳහා නාවික හමුදාපතිවරයාගේ ආවේක්ෂණ සංචිතයේ නාවිකයන් ද දසනායක සිය මෙහෙයුම් කටයුතු සඳහා යොදාගත් බව ඉන් හෙළි වෙයි. අමලන් ලියෝන් හා ඔහුගේ පුත්‍රයාව පැහැර ගැනීමෙන් පසුව ඒ ගැන දසනායක විස්තර දැන සිටි බව මේ වන විට පරීක්ෂකයන් තොරතුරු අනාවරණය කරගෙන ඇත.

නාවික හමුදාවට පුද්ගලයන් අත්අඩංගුවට ගෙන රඳවා තබා ගැනීමේ කිසිදු බලයක් නැත. එබැවින් පුද්ගලයන් එකළොස් දෙනෙකු නීති විරෝධි ලෙස රඳවා තබා ගනිමින් ඔවුනගේ ඥාතින්ගෙන් කප්පම් මුදල් ඉල්ලමින්, එසේ ලබා ගනිමින් ඔවුන්ව අතුරුදහන් කරමින් මේ සිදුකර ඇත්තේ බරපතළ වරදකි. ඔවුන්ව ඝාතනය කර නොමැති බවට අවම හෝ සැකයක් දැන් නොමැති තරම්ය. කනගාටුදායක කරුණ වනුයේ මෙම අවාසනාවන්ත ඉරණමකට මුහුණ දුන් මේ පුද්ගලයන් කිසිදු ත්‍රස්ත ක්‍රියාවකට හෝ අපරාධයකට සම්බන්ධ නොමැති පුද්ගලයන් බව නාවික හමුදාව හැර අන් සියලු අංශයන් හා කාර්යාංශ මඟින් දැනුම් දී තිබීමය.

එවැනි පසුබිමක මෙම පැහැර ගැනීමට ලක්වූ පුද්ගලයන් ත්‍රස්තවාදී ක්‍රියාවකට සම්බන්ධ වී ඇත්ද? නැද්ද? යන්න සම්බන්ධයෙන් නාවික හමුදාව දැනුම් නොදෙන්නේ කුමන පදනමකින් ද යන්න ගැටලු සහගතය. නිල ඇඳුමට මුවා වී තක්කඩි වැඩ කළ මෙවැනි අපරාධකරුවන් බේරා ගැනීම වෙනුවට, පැහැදිලි අධිකරණමය ක්‍රියාවලියක් තුළ ඔවුනට දඬුවම් පැමිණ වීමට කටයුතු කිරීම රණවිරුවන්ට කරන අපහාසයකට වඩා ඉතිරිව සිටින සැබෑ රණවිරුවන්ට කරන සැබෑ ගෞරවයක්ම වන බව අවසාන වශයෙන් ලියා තැබිය යුතුය.

| චාමර ලක්ෂාන් කුමාර 

ගිටාරය වයමින් මොළයේ සැත්කමට මුහුණ දුන් සංගීතඥයෙක් | VIDEO

මොළයේ සැත්කමකට ලක්වන අතරතුරදී ගිටාරය වාදනය කළ සංගීතඥයකු පිළිබඳ ඉන්දියාවෙන් වාර්තා වනවා.

අභිෂේක් ප්‍රසාද් නමැති මේ සංගීතඥයා බැංගලෝරයේදී සැත්කමකට යොමුවූයේ පාලනයකින් තොරව තම සිරුරේ ඇතිවන වේදනාත්මක ගැස්ම, ඇඹරීම සහ නැවත නැවතත් සිදුවන චලන හෝ අසාමාන්‍ය ඉරියව් සම්බන්ධයෙන් ප්‍රතිකර්මයක් යෙදීම සඳහායි.

ඒ අනුව අදාළ සැත්කම ක්‍රියාත්මකවන අතරේදී ප්‍රසාද්ගේ මොළයේ යම් පද්ධතියක් “අවුළුවන” සෑම අවස්ථාවකදීම ගිටාරය වයන ලෙස වෛද්‍යවරුන් විසින් ඔහුගෙන් ඉල්ලා තිබුණා.

ප්‍රසාද් විදෙස් මාධ්‍ය අමතමින්ට දැන් තමන්ට වඩාත් පහසුවෙන් ගිටාරය වාදනය කළ හැකි බව ප්‍රකාශ කළා.

‘මියුසිෂන්’ස් ඩිස්ටෝනියා’ (musician’s dystonia) යනුවෙන් සාමාන්‍යයෙන් හැඳින්වෙන රෝගී තත්ත්වයට ලක්වූ අභිෂේක් ප්‍රසාද් හට ගිටාරය වැයීමේදී සිය වමතේ මැදැඟිල්ල, වෙදැඟිල්ල සහ සුලැඟිල්ල චලනය කිරීම අපහසු ව තිබුණා.

“මං හිතුවේ අධික පුහුණුව නිසා මෙවැනි දරදඬු වීමක් සිදුවී ඇති බවයි. විවේකයක් ගැනීමෙන් අනතුරුව යළිත් උත්සාහ කළත් මට තේරුම් ගියා ඒ තත්ත්වයේ වෙනසක් නැති බව. මාංශපේශි අධික වෙහෙසට පත්වීම නිසා මෙසේ වන්නට ඇතැයි කී සමහර වෛද්‍යවරු වේදනා නාශක, විටමින් වර්ග, භෞතචිකිත්සාව ආදී නොයෙක් දේ දුන්නා” ප්‍රසාද් ප්‍රකාශ කළා.

මීට මාස නවයකට ඉහතදී ස්නායු විශේෂඥයකු නිවැරදිව නිශ්චය කළ ආකාරයට අභිෂේක් ප්‍රසාද් ට ඩිස්ටෝනියාව වැළඳී  තිබුණා.

“මොළයේ සැත්කමකට ලක්කළ යුතු යැයි කීවිට මං භය වුණා. නමුත් මගේ වෛද්‍යවරයා, ශරන් ශ්‍රීනිවාසන් මට විශ්වාසය දුන්නා” ප්‍රසාද් පැවසුවා.

සැත්කමේ සෑම අවස්ථාවක්ම තමන්ට අතිශය පැහැදිලිව මතක ඇති බව මේ සංගීතඥයා පැවසුවා.

එම්ආර්අයි ස්කෑන් පරීක්ෂාවකට පෙර, හිස්කබල කපා විවෘත කිරීම සඳහා ඇණ හතරකින් යුතු රාමුවක් තම හිසට සවි කල බවත් එමගින් මොළය ඇතුල් පද්ධතිය නිවැරදි කිරීම සඳහා කෙතරම් ගැඹුරට ඉලෙක්ට්‍රෝඩ ඇතුළු කළ යුතුද යන්න නිශ්චය කරගැනීමට එම ස්කෑන් පරීක්ෂාව  සිදුකල බවත්ක ඔහු පැවසුවා.

“සැත්කම අතරතුරදී මාව විදුලි ජනක යන්ත්‍රයක් සේ මට දැනුනත්, වේදනාවක් දැනුනේ නැහැ” යනුවෙනුත් ඔහු කියා සිටියා.

“අවශ්‍ය කොටස විතරක් නිර්වින්දනය කර ශල්‍යකර්මය කළ නිසා රෝගියාට වේදනාව දැනුනේ නැහැ” යැයි වෛද්‍ය ශ්‍රීනිවාසන් සඳහන් කළා.

හිස්කබලේ මිලිමීටර 14ක සිදුරක් සැකසීමෙන් අනතුරුව එතුළට සුවිශේෂී ඉලෙක්ට්‍රෝඩයක් ඇතුළු කළ බව කී වෛද්‍ය ශ්‍රීනිවාසන් “ඉලක්කගත කොටස තිබුනේ මොළයේ සෙන්ටිමීටර 8ත් 9ත් අතර ගැඹුරින්” බවත් විදෙස් මාධ්‍ය අමතා පැවසුවා.





බස් රථවල මහ හඬින් ක්‍රියාත්මක කරන රේඩියෝ ගැන පැමිණිලි කරන්න අංකයක්

පෞද්ගලික බස්‌ රථවල ගමන් ගන්නා මගීන්ට හිරිහැර වන පරිදි අධික ශබ්දයෙන් රේඩියෝ යන්ත්‍ර ක්‍රියාත්මක කරන බස්‌ රථ පිළිබඳව ඉදිරියේදී දැඩි පියවර ගන්නා බවට බස්‌නාහිර පළාත් මාර්ගස්‌ථ මගී ප්‍රවාහන අධිකාරිය පවසනවා.

එලෙසින් අධික ශබ්දයෙන් බස්රථවල කැසට් යන්ත්‍ර ක්‍රියාත්මක කරන බවට තමන්ට පැමිණිලි රැසක් ලැබී ඇති බවයි එම අධිකාරියේ සභාපති තුසිත කුලරත්න මහතා පවසන්නේ.

එලෙස බස් රථයකදී අධික ශබ්ධයෙන් රේඩියෝ සහ කැසට් යන්ත්‍ර වාදනය කරන අවස්තාවන් පිළිබඳව මහජනතාවට පැමිණිලි කිරීම සඳහා   0115-559595 යන දුරකථන අංකය විවුර්තව ඇති බවත් ඔහු ප්‍රකාශ කළා.

ලෝකයම හොල්ලපු පිටසක්වලින් පෘථිවියට සංඥාවක් ආපු කතාවේ ඇත්ත නැත්ත මෙන්න

පෘථෘවියේ සිටි ආලෝක වාර්ෂ 11ක් ඈතින් පිහිටි ග්‍රහලෝකයක් තුළින් නිකුත් වූ සංඥාවක් පිළිබඳ තාරකා විද්‍යාඥයින් මේ වන විට පරීක්ෂණ ආරම්භ කොට තිබේ.

මෙම ග්‍රහලොව අයත් තාරකාවේ ආලෝකය සූර්යාගේ ආලෝකය මෙන් 2800 ගුණයක් අඩු බවද වාර්තාවෙයි.කෙසේ වෙතත් රොස් 128 ලෙස නම් කෙරුණු මෙම තාරකාව වටා ගමන් කරන ග්‍රහලෝක පිළිබඳ නිශ්චිත තොරතුරු මෙතක් සොයාගැනීමට විද්‍යා:යින් අපොහොසත් වී තිබේ.

දකුණු ඇමරිකාවේ පුවටෝ රිකොහි පිහිටි රෙෂියෝ දුරේක්ෂය මගින් මෙම සංඥා ග්‍රහණය කොටගෙන තිබුණි.

කෙසේ වෙතත් මෙම සංඥා කිසියම් බුද්ධිමත් ජීවින් පිරිසක් නිකුත් කළේද නැද්ද යන්න පිළිබඳව තවමත් නිශ්චිතව ප්‍රකාශ කළ නොහැකි බව තරකා විද්‍යාඥයෝ වැඩිදුරටත් පවසති.

ශ්‍රී ලංකාවේ බහුදින ධීවර යාත්‍රා සඳහා රුපියල් මිලියන 78ක වියදමින් E- LOG BOOK


ධීවර හා ජලජ සම්පත් සංවර්ධන අමාත්‍යාංශය විසින් රුපියල් මිලියන 78ක වියදමින් මසුන් ඇල්ලීම පිළිබඳ තොරතුරු ඇතුළත් කිරීම සදහා ලබා දෙන ටැබ් පරිගණක හෙවත් E- LOG BOOK ලබා දීමට මේ වනවිට සියලු කටයුතු අවසන් කර ඇතැයි ධීවර හා ජලජ සම්පත් සංවර්ධන අමාත්‍ය මහින්ද අමරවීර මහතා පවසයි.
මේ යටතේ බහුදින ධීවර යාත්‍රා සදහා E- LOG BOOK 2328ක් ලබා දීමට නියමිතය. ජාත්‍යන්තර මුහු‍‍දේ මත්ස්‍ය සම්පත නෙලා ගැනීමේ දී අන්තර් ජාතික නීතිය අනුව එක් එක් බහුදින ධීවර යාත්‍රාව විසින් අල්ලා ගනු ලබන මසුන් පිළිබද දත්ත පරිගණක ගත කළ යුතුය. එමෙන්ම ඒ පිළිබද තොරතුරු සෑම රටක්ම යුරෝපා සංගමයට ලබා දිය යුතු අතර එසේ කරන්නේ මත්ස්‍ය සම්පත නෙලා ගැනීමේ දී බොහෝ රටවල් කළමනාකරණයකින් තොරව එම කටයුතු සිදු කිරීම වැළැක්වීම සදහාය. එමෙන්ම මත්ස්‍ය සම්පත ආරක්ෂා කර ගැනීම මෙන්ම ඉවක් බවක් නැතිව සිදු කරන ධීවර කර්මාන්තයේ දී සිදුවන සම්පත් අවභාවිතය වළක්වාලීම සඳහා ය.

මේ යටතේ ශ්‍රී ලංකාවේ වත්මන් රජය යටතේ මෙම ජාත්‍යන්තර ධීවර නීති පිළිපදින රටක් වශයෙන් අන්තර් ජාතික පිළිගැනීමට ලක්වීම අවශ්‍ය වේ. විශේෂයෙන් පසුගිය රජය සමයේ යුරෝපා සංගමය විසින් මත්ස්‍ය අපනයනය තහනම පනවනු ලැබුවේ ද එම අන්තර් ජාතික නීති ක්‍රියාත්මක කිරීමට එවකට පැවැති රජය පියවර නොගත් නිසාය.

කෙසේ වුවද මෙම E- LOG BOOK භාවිතය සදහා යොදා ගන්නා මෘදුකාංග මේ වනවිට කොළඹ විශ්ව විද්‍යාලයේ තොරතුරු තාක්ෂණ අංශය විසින් සකස් කර ඇති අතර ධීවර ප්‍රජාවට එම මෘදුකාංග භාවිතය හා E- LOG BOOK භාවිතය පිළිබද පුහුණුවක් ලබා දීමට ද සැලසුම් කර ඇත. මෙම E- LOG BOOK ධීවර ප්‍රජාව වෙත නොමිලේ බෙදා දීමට කටයුතු කරන අතර ඒවා ඉදිරි දිනෙක බෙදා හැරීමට කටයුතු යොදා ඇතැයි ද අමාත්‍ය මහින්ද අමරවීර මහතා පැවසීය.


සුදු වෑන් රිය මුදල් අමාත්‍යාංශයේ නොවේලු

වෛද්‍ය පීඨ ශිෂ්‍ය ක්‍රියාකාරී කමිටුවේ කැඳවුම්කරු රයන් ජයලත් සිසුවා  අත්අඩංගුවට ගැනීමට පැමිණි බව කියන සුදු පැවැති කේ.ඩි.එච්. වෑන් රිය විදේශ කටයුතු අමාත්‍යාංශයට අයත් බවට සමාජ මාධ්‍ය හරහා පැතිර යන වාර්තා මුදල් අමාත්‍යාංශය විසින් ප්‍රතික්ෂේප කර තිබේ.

එසේම විද්වත් වෘත්තිකයන්ගේ සංගමය ඉදිරිපිටදී බ්‍රහස්පතින්දා දිනයේදී සිදුවූ සිදුවීමට මුදල් අමාත්‍යාංශයේ කිසිදු සම්බන්ධයක් නොමැති බවත් ඔවුන් සඳහන් කරයි.

මේ අතර ඊයේ පැවැති මාධ්‍ය හමුවකදීද මුදල් අමාත්‍ය මංගල සමරවිර මහතා සඳහන් කළේ සිද්ධිය පිළිබඳව තමන් පොලිස්පතිවරයගෙන් විමසා සිටි බවත් පොලීසිය අපකීර්තියට පත්කිරිමේ අරමුණනින් පොලීසියේම කිහිපදෙනෙකු මෙම ක්‍රියාව සිදුකර ඇති බවත්ය.


2011 තරග පාවාදීමක් වූ බව කීවේ නෑ - අතුරු කමිටුවක් ඕනෑ

2011 වසරේදී ඉන්දියාවේ පැවැති එක්දින ලෝක කුසලාන තරගාවලියේදී තරග පාවාදීමක් සිදු වූ බවට තමන් ප්‍රකාශ කර නොමැති බවත් තමන් පැවැසුවේ ඒ පිළිබඳව සැකයක් පවතින බවත් ශ්‍රී ලංකාව තුළ කට කතාවක් පැතිර යන බවත් යැයි ශ්‍රී ලංකා ක්‍රිකට් කණ්ඩායමේ හිටපු නායක, අමාත්‍ය අර්ජුන රණතුංග මහතා පැවැසීය.

සිය ට්විටර් ගිණුම හරහා ප්‍රකාශයක් කරමින් අර්ජුන රණතුංග මහතා මේ බව (21දා) ප්‍රකාශ කළේය.

එසේම යහපාලන රජය යටතේ ක්‍රිකට් ක්‍රීඩාව විනාශ වී යමින් පවතින බවත් ඒ බව ඉදිරි  දිනවලදී ලිපි මගින් ජනපතිවරයා හා අග්‍රාමාත්‍යවරයා දැනුවත් කිරීමට පියවර ගන්නා බවත් ඔහු ප්‍රකාශ කළේය.

මේ වන විට ක්‍රිකට් ක්‍රීඩාව බුකීකරුවන් විසින් පාලනය කරමින් තිබෙන බවත් මේ ක්‍රිකට් ආයතනයට අතුරු කමිටුවක් පත්කිරිමට හොඳම කාලය බවත් ඔහු සිය ට්විටර් ගිණුමෙන් වැඩිදුරටත් ප්‍රකාශ කළේය.

ඩෙංගුවලට පැපොල් යුෂ

ඩෙංගු රෝගීන් සඳහා පැපොල් පත‍්‍ර යුෂ ලබාදීම සුදුසු ද යන්න සොයා බැලීමට විද්‍යාත්මක පර්යේෂණ සිදු කළ යුතු බව සෞඛ්‍ය අමාත්‍ය රාජිත සේනාරත්න මහතා පවසනවා.

අමාත්‍යවරයා කියා සිටියේ ඩෙංගු මර්ධනය පිළිබඳ විශේෂඥයින් පැපොල් පත‍්‍ර යුෂ ඖෂධය පිළිනොගන්නා බවයි. එහෙත් ඉන්දියාව සහ ඕස්ටේ‍්‍රලියාව පැපොල් පත‍්‍ර යුෂ ආශ‍්‍රයෙන් ඖෂධ නිෂ්පාදනය කරන බවද අමාත්‍ය රාජිත සේනාරත්න මහතා පැවසුවා.

ඩෙංගු රෝග මර්දනය සඳහා පැපොල් පත‍්‍ර යුෂ ඖෂධය සුදුසු බවට සමාජය තුළ මතයක් පවතිනවා. එය සොයා ගත්තේ ද ශ‍්‍රී ලංකාවෙන්.

එය රෝගය මර්දනය සඳහා සුදුසු ඖෂධයක් ද යන්න පර්යේෂණ මගින් සොයාගත යුතු බවයි රාජිත සේනාරත්න අමාත්‍යවරයා වැඩිදුරටත් පැවසුවේ.

ශ‍්‍රී ලංකා ආයුර්වේද සංස්ථාවේ පැවති උත්සවයකට එක්වෙමින් අමාත්‍යවරයා මෙම අදහස් පල කළා.

මානව හිමිකම් රකින මුල් රටවල් 30ට ශ්‍රී ලංකාවත් එක්වෙයි

මානව හිමිකම් සඳහා ප්‍රමුඛතාවය ලබාදෙන ලොව රටවල් තිහෙන් එකක් ලෙස ශ්‍රී ලංකාව නම් කිරීමට එක්සත් රාජධානිය තීරණය කර තිබෙනවා.

ඒ, සිය වාර්ෂික මානව හිමිකම් වාර්තාව අද පස්වරුවේ නිකුත් කරමින්.

19 වැනි වරට එළිදැක්වූ මෙම වාර්තාව මගින් පසුගිය වසරේ මෙරට මානව හිිමිකම් තත්වයේ වර්ධනය පැසසුමට ලක් කරමින් එක්සත් රාජධානිය ප්‍රකාශ කර ඇත්තේ ශ්‍රී ලංකාව තවත් බොහෝ දෑ සිදුකළ යුතු බවයි.



ඩෙංගු රෝගීන් ලක්ෂයට ළං වෙයි

ඩෙංගු රෝගය පැතිරීම හේතුවෙන් ශ්‍රී ලංකාවේ සංචාරය කිරීම සදහා සීමා පැනවීමට කිසිදු නිර්දේශයක් නිකුත් කර නොමැති බව ලෝක සෞඛ්‍ය සංවිධානය ප්‍රකාශ කළා.

නිවේදනයක් නිකුත් කරමින් එම සංවිධානය ප්‍රකාශ කළේ රෝගය මර්දනය කිරීම සදහා ලෝක සෞඛ්‍ය සංවිධානය ද ශ්‍රී ලංකාවට සහාය ලබාදීමට පියවර ගෙන ඇති බවයි.

ඒ අනුව, ඩෙංගු මර්දන වැඩපිළිවෙලට සහාය දීම සදහා කීට විද්‍යාඥයෙකු සහ ඩෙංගු කළමනාකරණ විශේෂඥයින් දෙදෙනෙකු මෙරටට එවා ඇති බව එහි සදහන්.

කෙසේ නමුත්, ඩෙංගු රෝගය පාලනය නොකළහොත් ඉදිරියේදී එය සංචාරක කර්මාන්තයට ද බලපෑම් එල්ල කළ හැකි බව ක්ෂේත්‍රයේ පාර්ශවකරුවන් පවසනවා.

දැනට ඩෙංගු රෝගය වැළදී ඇති රෝගීන්ගේ සංඛ්‍යාව ලක්ෂයට ආසන්න වී ඇති අතර, දක්වා ඉහළ ගොස් ඇති අතර, තවත් පුද්ගලයන් 290 දෙනෙකු මියගොස් තිබෙනවා.

මේ අතර, ඩෙංගු රෝගය තුරන් කිරීමේ ජාතික වැඩසටහනේ තුන්වන අදියර  (21) ක්‍රියාත්මකයි.

ඒ යටතේ පාසල්, රාජ්‍ය හා පෞද්ගලික ආයතන පරිශ්‍ර පිරිසිදු කිරීම ආරම්භ කෙරෙන බවයි සෞඛ්‍ය අමාත්‍යාංශය සදහන් කළේ.

1870 පසුව වැඩිම උෂ්ණත්වය චීනයට බලපායි

චීනයේ ෂැංහයි නුවර සෙන්ටිගේ‍්‍රඩ් අංශක 40 ඉක්ම වූ දැඩි උෂ්ණත්වයක් දැන් වාර්තා වනවා.

දැඩි උණුසුම හේතුවෙන් එහි රෝහල් ගත වන පිරිස ද ඉහළ ගොස් ඇති බවයි විදෙස් වාර්තා සඳහන් කළේ.

ෂැංහයි නුවර සත්වෝද්‍යානයේ ඇතැම් සතුන්ගේ කුටි අවට අයිස් ඇතිරීමට සිදුව ඇත්තේ දැඩි උණුසුම පාලනය කිරීමටයි.

චීනයේ වඩාත්ම ජනාකීර්ණ නගරය වන ෂැංහයි හි උෂ්ණත්වය දැන් සෙන්ටි‍්‍රගේ‍්‍රඩ් අංශක 40.9 දක්වා ඉහළ ගොස් ඇති අතර, එය 1872 වසරේ එහි උෂ්ණත්වය මැනීම ආරම්භ කළ පසු වාර්තා වූ ඉහළම උෂ්ණත්වයයි.

ශ්‍රී ලාංකේය පිහිනුම් ඉතිහාසයේ ඉහළම පදක්කම කයිල්ට

පොදු රාජ්‍ය මණ්ඩලයීය යොවුන් ක්‍රීඩා උළෙලේ මීටර් 100 නිදහස් ආර තරගය තත්පර 50. 93 කින් නිම කළ කයිල් අබේසිංහ රිදී පදක්කමක් දිනා ගනියි.

ශ්‍රී ලාංකේය පිහිනුම් ක්‍රීඩා ඉතිහාසයේදී එදා මෙදාතුර ජාත්‍යන්තර තලයේ දිනාගත් ඉහළම සම්මානය ලෙස මේ ජය්‍රහණය ඉතිහාසයට එක් විය. ශ්‍රී ලංකාව මෙතෙක් දිනා තිබුණේ ආසියානු මට්ටමේ පිහිනුම් ජය්‍රහණ පමණක් වුවද කයිල් අබේසිංහ එය ඉක්මවා යෑමට සමත්වීම විශේෂත්වයකි.

බහමාස් බෙටී කෙයිලී පිහිනුම් සංකීර්ණයේ ඊයේ පැවැති මේ ඉසව්වේ රන් පදක්කම ස්කොට්ලන්තයේ ස්කෝට් ඇලෙක්ස් තත්පර 50.46කින් දිනාගත් අතර ලෝකඩ පදක්කම සිංගප්පුරුවේ ජොනතන් ටෑනි තත්පර 51.10කින් හිමිකර ගත්තේය.

ඉතිහාසය ගැලවෙයි සමාජ අධ්‍යයනය එයි

දැනට පවතින ඉතිහාසය, භූගෝල විද්‍යාව, පුරවැසි අධ්‍යාපනය යන විෂයයන් වෙනුවට ප්‍රජාචාරය සහ සමාජ අධ්‍යයනය විෂයය හඳුන්වා දිය යුතු බව ජාතික අධ්‍යාපන කොමිෂන් සභාව යෝජනා කර ඇත.

ආර්ථික විද්‍යාවේ මූලික සංකල්ප එම විෂයයට ඇතුළත් විය යුතු යෑයිද එම යෝජනාවේ සඳහන් වේ.

සාමාන්‍ය අධ්‍යාපනය පිළිබඳ ජාතික ප්‍රතිපත්තිය සඳහා ජාතික අධ්‍යාපන කොමිෂන් සභාව විසින් සකස්‌කරන ලද යෝජනා මාලාවේ ඉහත යෝජනාව ඇතුළත්ව ඇති අතර, සාමාන්‍ය අධ්‍යාපනය යටතේ පවතින ප්‍රායෝගික හා තාක්‌ෂණ කුසලතා සෞඛ්‍ය හා ශාරීරික අධ්‍යාපනය මෙන්ම අලුතින් හඳුන්වාදීමට යෝජනා කර ඇති ප්‍රජාචාරය සහ සමාජ අධ්‍යයනය විෂයයටද ජීවන කුසලතා අන්තර්ගත කිරීම අවශ්‍ය බවද එහි සඳහන්ව තිබේ.

එමෙන්ම සාමාන්‍ය පෙළ විභාගයට පෙනීසිටින දරුවන් සඳහා දැනට පවතින හර විෂයයන් හයට අමතරව ඇති වෛකල්පිත විෂයයන් තුන, දෙක දක්‌වා අඩු කිරීමටද කොමිෂන් සභාව යෝජනා කර තිබේ.